Toshkent qishloq
xo’jalik instituti faoliyat ko’rsatgan yillari davomida turli yillarda tor
ixtisoslik bo’yicha ham mutaxassislar tayyorlandi. Masalan, turli yillarda
agronomiya, paxtachilik, seleksiya va uru`chilik, efir moyli o’simliklar,
tolali o’simliklar, meva va sabzavotchilik, uzumchilik, subtropik
o’simliklar, himoyalangan tuproq sabzavotchiligi, uzumchilik va uzumni
birlamchi qayta ishlash, o’simliklar himoyasi - o’simliklarning biologik
himoyasi, o’rmon xo’jaligi - o’rmon meleoratsiyasi, bog`-xiyobon
qurilishi bo’yicha mutaxassislar tayyorlandi.
Mamlakatimizning
barcha yirik qishloq xo’jalik korxonalari, ilmiy muassasalari, qishloq
xo’jalik institutlari va qishloq xo’jaligi ishlab chiqarishini boshqarish
organlarida, shuningdek, Markaziy Osiyoning boshqa davlatlarida ham Toshkent qishloq
xo’jalik instituti bitiruvchilari mehnat qilmoqda. Ular mamlakatimiz xalq
xo’jaligining rivojlanishiga o’zlarining munosib ulushlarini qo’shmoqda.
Oliy o’quv yurtining ko’plab bitiruvchilari ishlab chiqarish ilg`orlari,
yirik olimlar bo’lib yetishdi, davlat va xo’jalik boshqaruv organlarida
mas`ul lavozimlarni egallab, shirkat, kooperativ, ijara, jamoa, dehqon,
fermer va boshqa xo’jaliklarning yirik mehnat jamoalarini boshqarayotir.
Bitiruvchilarimiz orasida Oliy Majlis, viloyat va tuman kengashlari
deputatlari bor. 40 nafardan oshiq bitiruvchimiz Mehnat qahramoni unovniga
sazovor bo’ldi, ko’pchiligi esa hukumat va davlat mukofotlari bilan
taqdirlanib, ko’pchiligiga faxriy unvonlar berildi.
Mazkur
oliy o’quv yurti qishloq xo’jaligi ishlab chiqarish mutaxassislarini qayta
tayyorlash va malakasini oshirish markazi hisoblanadi. 40-yillarda institut
qoshida o’simliklarni himoya qilish va pillachilik bo’yicha agronomlar
tayyorlash, O’rta Osiyo respublikalari uchun mutaxassislar tayyorlovchi bir
yillik kurslar faoliyat ko’rsatgan.
1996
yilda qishloq xo’jalik mutaxassislari malakasini izchil va yuqori darajada
oshirish maqsadida oliy o’quv yurti huzurida kolxoz va sovxozlar
rahbarlarining bir yillik maktabi hamda vazirlik huzuridagi uch oylik
malaka oshirish kurslari bazasida malaka oshirish fakulteti tashkil etildi.
