Oliy
o’quv yurtining malaka oshirish fakultetida dastlab ikkita bo’lim, ya`ni
kolxoz va sovxozlar uchun rahbar kadrlar tayyorlash bo’yicha olti oylik
o’qitish bo’limi hamda 80-yillargacha 10-12 ta, keyinchalik 16-18 ta
mutaxassislik bo’yicha 1-3 oylik qishloq xo’jalik rahbar kadrlari va
mutaxassislari malakasini oshirish bo’limi faoliyat yuritdi. Shundan so’ng
rahbar kadrlarni tayyorlash bo’lim yopildi. Biroq, turli viloyatlar,
respublika vazirlik va idoralari rahbarlari ishtirokidagi ikki haftalik
seminarlar o’tkazish yo’li bilan malaka oshirish sezilarli darajada
kengaydi.
Oliygohning
malaka oshirish fakultetida boshqa ittifoqdosh respublikalar mutaxassislari
ham o’simliklarni himoya qilishning biologik usuli, pillachilik, qishloq
xo’jalik toksikologiyasi va radiobiologiyasi, sabzavotchilik, qishloq
xo’jaligi korxonalarini taftish va nazorat qilish mutaxassisliklari
bo’yicha o’z malakalarini oshirishdi. Ba`zi yillari oliy o’quv yurtining
malaka oshirish fakultetida 1500-1800 nafar qishloq xo’jalik mutaxassisi
o’z malakalarini oshirdi. Jami fakultetda 45 ming nafardan oshiq mutaxassis
o’z malakasini oshirdi.
Toshkent
qishloq xo’jalik instituti qariyb yarim asr davomida chet el mamlakatlari
uchun ham mutaxassislar tayyorladi. Oliy o’quv yurtida xorijiy talabalarni
tayyorlash 1946 yildan, aspirantlarni tayyorlash esa 1948 yildan boshlandi.
1951 yilda ularning birinchi qaldir`ochlari aspiranturani bitirdi. Shundan
buyon Toshkent qishloq xo’jalik instituti Yevropa, Osiyo, Afrika va Lotin
Amerikasining 71 ta mamlakati uchun 1039 nafar oliy ma`lumotli mutaxassis,
40 ta mamlakatning 206 nafar fan nomzodini tayyorladi. Ularning orasida
Vetnam uchun bir nafar fan doktori tayyorlandi.
1976
yildan 1990 yilgacha oliy o’quv yurti huzurida BMTning o’qish muddati o’n
hamda besh oylik iqtisodiyot va qishloq xo’jaligi statistikasi bo’yicha
mutaxassislar malakasini oshirish kurslari ishlab turdi. Mazkur kurslarda
Yevropa, Osiyo, Afrika va Lotin Amerikasining 75 mamlakatidan 615 nafar
mutaxassis o’z malakalarini oshirdi. Bundan tashqari, 25 ta chet el
mamlakatining 111 nafar mutaxassisi turli kafedralarda stajirovkadan
o’tishdi.
